eAstra News

फागुन २१ गते हुने निर्वाचनका लागि आज देशभर मनोनयन दर्ता सम्पन्न भएको छ। मुख्यमन्त्री सुरेन्द्रराज पाण्डेले मनोनयन दर्ता प्रक्रिया केवल उम्मेदवारको नाम दर्ता गर्ने कार्य मात्र नभई लोकतन्त्रप्रतिको साझा प्रतिबद्धताको पुनःपुष्टि भएको बताएका छन्।

लोकतान्त्रिक अभ्यासलाई थप सुदृढ बनाउने उद्देश्यका साथ सम्पन्न हुन गइरहेको यस निर्वाचनलाई नेपालको राजनीतिक यात्रामा एक महत्वपूर्ण मोडका रूपमा लिनुपर्ने मुख्यमन्त्री पाण्डेको भनाइ छ। निर्वाचनलाई निष्पक्ष, भयरहित र सफल बनाउँदै लोकतन्त्रलाई अझ बलियो बनाउने दायित्व सबैको साझा जिम्मेवारी रहेको उनले उल्लेख गरे।

लोकतन्त्र, संविधान, समावेशिता, सामाजिक न्याय र नागरिक स्वतन्त्रताको पक्षमा निरन्तर आवाज उठाउँदै आएको राजनीतिक दलको रूपमा नेपाली कांग्रेसको यो निर्वाचन सफल बनाउन महत्वपूर्ण भूमिका रहने पाण्डेले बताए। उनले विगतका घटनाबाट पाठ सिक्दै आक्रोश र निराशाभन्दा आशा र समाधानको राजनीतितर्फ अघि बढ्नुपर्ने आवश्यकता औंल्याए।

पछिल्लो समय देशले भोगेको राजनीतिक अस्थिरता, अविश्वासको वातावरण तथा आन्दोलनका नाममा भएका भौतिक र सामाजिक क्षतिले सबैलाई गम्भीर रूपमा सोच्न बाध्य बनाएको उनको भनाइ छ। राणा शासनविरुद्धको संघर्षदेखि संघीय लोकतान्त्रिक गणतन्त्रको संस्थागत विकाससम्म नेपाली कांग्रेसले देशलाई सही दिशामा अघि बढाउने नेतृत्वदायी भूमिका निर्वाह गर्दै आएको तथ्य इतिहासले प्रमाणित गरिसकेको उनले स्मरण गराए।

हालको जटिल अवस्थामा नेपाली कांग्रेसका नेता, कार्यकर्ता र आम शुभेच्छुकलाई आन्तरिक मनमुटाव बिर्सेर विवेकपूर्ण निर्णय, एकता र सहकार्य तथा स्थायित्वका लागि एकतावद्ध हुन मुख्यमन्त्री पाण्डेले आग्रह गरे। उनले चारतारे झण्डा बोकेर रुख चिन्हमा मतदान गर्न जनतामाझ जान आह्वान गर्दै, देशलाई वर्तमान संकटबाट निकास दिन आम मतदातालाई नेपाली कांग्रेसको रुख चिन्हमा मतदान गर्न अपील गरे।