गोरखा । गोरखा जिल्लामा फागुन २१ गते हुने प्रतिनिधि सभा सदस्य निर्वाचनका लागि आवश्यक मतपत्र आइपुगेको छ। दुबै निर्वाचन क्षेत्रका प्रत्यक्ष तथा समानुपातिक तर्फका मतपत्र शनिबार जिल्लामा ल्याइएको हो।
क्षेत्र नम्बर १ मा प्रत्यक्षतर्फ १ लाख ३० हजार र समानुपातिकतर्फ १ लाख ३७ हजार मतपत्र प्राप्त भएको सहायक निर्वाचन अधिकृत कृष्णमुरारी सिग्देलले जानकारी दिए। क्षेत्र नम्बर २ मा प्रत्यक्ष र समानुपातिक दुवैतर्फ १ लाख १७ हजार मतपत्र आइपुगेको सहायक निर्वाचन अधिकृत सरोज भण्डारीले बताए। मतपत्रलाई छुट्याएर प्याकिङ गर्ने काम भइरहेको जनाइएको छ।
जिल्लामा कुल २ सय २५ मतदानस्थल र ३ सय ३१ मतदान केन्द्र तोकिएका छन्। तीमध्ये ८३ मतदानस्थललाई अतिसंवेदनशील सूचीमा राखिएको छ। निर्वाचनका लागि आवश्यक अन्य सामग्री व्यवस्थापन सकिएको छ भने मतदान अधिकृत तथा सहायक मतदान अधिकृतलाई तालिम दिने तयारी गरिएको जिल्ला निर्वाचन कार्यालयले जनाएको छ।
दुबै क्षेत्रमा गरी २५ जना उम्मेदवार चुनावी प्रतिस्पर्धामा छन्।