eAstra News

गोरखा, जेठ २६ । गोरखामा १६ औं गण्डकी प्रदेशस्तरीय राष्ट्रपति रनिङ शिल्ड प्रतियोगिता सोमबारदेखि सुरु भएको छ। प्रतियोगिताको उद्घाटन गण्डकी प्रदेशका मुख्यमन्त्री सुरेन्द्रराज पाण्डेले हरमटारी खेलमैदानमा एक विशेष समारोहबीच गरेका हुन्।

प्रदेश खेलकुद परिषद् गण्डकीको आयोजनामा र जिल्ला खेलकुद विकास समिति गोरखाको व्यवस्थापनमा जेठ २६ र २७ गते सञ्चालन हुने प्रतियोगितामा गण्डकी प्रदेशका ११ वटै जिल्लाबाट एक हजारभन्दा बढी खेलाडीको सहभागिता रहेको छ। प्रतियोगितामा भलिबल, कबड्डी, तेक्वान्दो, कराते, एथलेटिक्स र उसु गरी विभिन्न खेल विधाहरू समावेश छन्।

जिल्ला खेलकुद विकास समिति गोरखाका अध्यक्ष प्रेमबहादुर तामाङका अनुसार गोरखा नगरपालिका–६ स्थित हरमटारी खेलमैदानमा भलिबल र कबड्डी, कभर्ड हलमा तेक्वान्दो र कराते, गोरखा नगरपालिका–१० छेवेटारस्थित मैदानमा एथलेटिक्स तथा विपद व्यवस्थापन हलमा उसु खेलहरू आयोजना गरिने छन्।

प्रतियोगिताबाट छनौट हुने १०६ जना खेलाडीले केन्द्रीयस्तरको राष्ट्रपति रनिङ शिल्ड प्रतियोगितामा गण्डकी प्रदेशको प्रतिनिधित्व गर्नेछन्। प्रतियोगिता सञ्चालनमा ५५ लाख रुपैयाँ खर्च हुने अनुमान गरिएको छ।

उद्घाटन समारोहमा बोल्दै मुख्यमन्त्री पाण्डेले गण्डकी प्रदेशले खेलकुदलाई खेल पर्यटनसँग जोडेर अगाडि बढाउने नीति लिएको बताए। उनले भने, “पहिले जस्तो खेलमा लागेर भोकै बस्नुपर्ने अवस्था अहिले छैन, अब खेललाई पनि पेसाको रूपमा लैजाने परिस्थिति बनिसकेको छ।”

मुख्यमन्त्री पाण्डेले सीमित स्रोतसाधनका बाबजुद पनि प्रदेश सरकारले खेलकुदलाई प्राथमिकतामा राखेको उल्लेख गर्दै खेलाडीहरूलाई आफ्नो प्रतिभालाई करियरको रूपमा अगाडि बढाउन प्रेरणा दिन आग्रह गरे।