eAstra News

काठमाडौं । निर्वाचन आयोगले स्थानीय तहका निर्वाचित जनप्रतिनिधिहरूलाई कुनै पनि राजनीतिक दल वा उम्मेदवारको पक्षमा निर्वाचन प्रचारप्रसारमा सहभागी नहुन आग्रह गरेको छ।

आयोगका सूचना अधिकारी सुमन घिमिरेका अनुसार केही जनप्रतिनिधि आचारसंहिता विपरीत दल तथा उम्मेदवारको प्रचारमा संलग्न भएको गुनासो आएपछि आयोगले यस्तो स्पष्टोक्ति दिएको हो। निर्वाचन आचारसंहिताको दफा ५ (क) को देहाय ४ अनुसार स्थानीय तहका जनप्रतिनिधिले आफ्नो कार्यक्षेत्रभित्र कुनै पनि दल वा उम्मेदवारको प्रचारप्रसारमा भाग लिन नपाउने व्यवस्था छ।

फागुन २१ गते हुने प्रतिनिधिसभा सदस्य निर्वाचनका लागि फागुन ४ देखि १८ गते राति १२ बजेसम्म मात्र प्रचारप्रसार गर्न पाइने आयोगले जनाएको छ। निर्वाचनलाई स्वच्छ, निष्पक्ष र मर्यादित बनाउन आचारसंहिता कडाइका साथ पालना गर्न आयोगले सबै पक्षलाई अनुरोध गरेको छ।