eAstra News

गोरखा, असार २२ । गोरखा जिल्लालाई पुनः पूर्णखोप सुनिश्चितता तथा दिगोपना जिल्ला घोषणा गरिएको छ। प्रदेश जनस्वास्थ्य कार्यालय, गोरखाको सभाहलमा आयोजित कार्यक्रममा घोषणा गरिएको हो। कार्यक्रम जिल्ला समन्वय समिति गोरखाका प्रमुख मोहनबहादुर थापाको अध्यक्षतामा सम्पन्न भएको हो।

गोरखा जिल्ला २०७४ चैत १ गते पहिलोपटक पूर्णखोप जिल्ला घोषणा भएको थियो। त्यसयता नेपाल सरकारको पूर्णखोप सुनिश्चितता तथा दिगोपना कार्यक्रमअन्तर्गत प्रत्येक वर्ष घरधुरी सर्वेक्षण, तथ्यांक प्रमाणीकरण र अनुगमन गर्दै पूर्णखोपको अवस्था कायम राखिँदै आएको छ। कोभिड–१९ महामारीका कारण केही वर्ष नियमित घोषणा प्रक्रिया प्रभावित भए पनि पछिल्ला वर्षदेखि कार्यक्रमले पुनः निरन्तरता पाएको हो।

आर्थिक वर्ष २०८२/८३ मा गरिएको घरधुरी सर्वेक्षणअनुसार ०–१५ महिनाका २,७६४ जना र १६–२३ महिनाका १,७७५ जना बालबालिका भेटिएका थिए। तीमध्ये १६–२३ महिनाका सबै बालबालिकाले पूर्णखोप प्राप्त गरेका थिए भने ०–१५ महिनाका सबै बालबालिका नियमित खोप सेवामा रहेको पुष्टि भएको छ। सर्वेक्षणमा एक जना पनि ‘शून्य डोज’ (एकपटक पनि खोप नलगाएको) बालबालिका भेटिएन।

सर्वेक्षणका क्रममा आंशिक खोप छुटेका ६ जना बालबालिका पहिचान गरिएको थियो। उनीहरूलाई वैशाख–जेठ महिनाको नियमित खोप कार्यक्रममा समेटेर पूर्णखोप दिइएको र त्यसपछि जिल्ला खोप समन्वय समितिले सबै पालिकामा तथ्यांक प्रमाणीकरण तथा अनुगमन सम्पन्न गरेको थियो। अनुगमनमा खोपबाट छुटेका बालबालिका नभेटिएपछि प्रदेश खोप समन्वय समितिले असार २० गते घोषणा गर्न अनुमति दिएको थियो।

प्रतिवेदनअनुसार नेपालमा हाल १३ प्रकारका खोप नियमित रूपमा निःशुल्क उपलब्ध गराइँदै आएको छ। यस वर्षदेखि एचपीभी (HPV) खोप पनि नियमित खोप कार्यक्रममा समावेश गरिएको छ, जसले भविष्यमा पाठेघरको मुखको क्यान्सरबाट हुने मृत्यु घटाउन सहयोग पुग्ने अपेक्षा गरिएको छ।