गोरखालाई आज पूर्णखोप दीगोपना सुनिश्चितता जिल्ला घोषणा गरिएको छ । जिल्ला खोप समन्वय समिती गोरखाको आयोजनामा गोरखा सदरमुकाम स्थित स्वास्थ्य कार्यालयको सभाहलमा एक कार्यक्रम आयोजना गर्दै गोरखालाई पूर्णखोप दीगोपना सुनिश्चितता जिल्ला घोषणा भएको हो ।
जिल्ला समन्वय समिति गोरखाको संयोजक मोहन बहादुर थापाको अध्यक्षता तथा सामाजिक विकास तथा स्वास्थ्य मन्त्रालयका सचिव डा. विनोदविन्दु शर्माको प्रमुख आतिथ्यतामा भएको कार्यक्रममा ११ वटै स्थानीय तहका पालिका प्रमुख, उपप्रमुख, प्रमुख जिल्ला अधिकारी, पालिका, वडामा कार्यरत स्वास्थ्यकर्मी, नेपाल प्रहरी, सन्चारकर्मी, लगायतको सहभागिता रहेको थियो ।
जिल्ला भित्रका सबै बालबालिकाले पुर्णखोप पाएको भेटिएसँगै जिल्ला पुर्णखोप सुनिश्चिता जिल्ला घोषण गरिएको जिल्ला खोप समन्वय समितिको सदस्य सचिव यम प्रसाद शर्माले बताउनुभयो ।
जिल्लाका ९४ वटै वडाहरुमा पूर्णखोप दीगोपना तथा सुनिश्चितता कार्यक्रम सम्पन्न गरेपछि पालिकाहरुलाई घोषणा गरिएको र पालिकाको सकेपछि अहिले जिल्लालाई घोषणा गरिएको उहाँले जानकारी दिनुभयो । उहाँका अनुसार गत जेठ २० देखि असार ६ गतेसम्म जिल्लाका सबै पालिकाहरुलाई पूर्ण खोप दीगोपना तथा सुनिश्चितता पालिका घोषणा गर्ने कार्य सम्पन्न भएको हो ।
यस आर्थिक वर्ष २०७९/८० सम्ममा १६ देखि ५९ महिना सम्मका ९ हजार २ सय छैसठ्ठी बालबालिकाहरुले पुर्ण खोप लगाएको पाईयो भने १५ महिना भित्रका ३ हजार ९ सय अठासी बालबालिकाहरुले नियमित रुपमा खोप सेवा लिईरहेको उहाले जानकारी दिनुभयो ।
