eAstra News

गोरखा, वैशाख १० २०८३। प्रदेश अस्पताल गोरखाले अस्पतालको सेवा प्रवाह, सुधारका प्रयास तथा आगामी योजनाबारे जानकारी गराउने उद्देश्यले “पत्रकारहरूसँग अस्पतालको सेवा सम्बन्धी अन्तरक्रिया कार्यक्रम” आयोजना गरेको छ। कार्यक्रममा जिल्लाका पत्रकारहरूको सक्रिय सहभागिता रहेको थियो।

कार्यक्रमको अध्यक्षता अस्पताल व्यवस्थापन समितिका अध्यक्ष कृष्ण ढकालले गरेका थिए भने प्रमुख अतिथिका रूपमा डा. गुणराज लोहनीको उपस्थिति रहेको थियो। अस्पतालसम्बन्धी विस्तृत जानकारी निमित्त प्रमुख मेडिकल सुपरिटेन्डेन्ट डा. शम्भु अधिकारीले पावर पोइन्ट प्रस्तुतीकरणमार्फत प्रस्तुत गरेका थिए।

प्रस्तुतीकरणमा अस्पतालले २४ सै घण्टा आकस्मिक सेवा, प्रयोगशाला, फार्मेसी, एक्स–रे, प्रसूति सेवा, शल्यक्रिया लगायतका सेवा प्रदान गर्दै आएको तथा ओपीडीमार्फत विभिन्न विशेषज्ञ सेवा उपलब्ध गराइँदै आएको जानकारी दिइयो। पछिल्ला वर्षहरूमा सेवाग्राहीको संख्या उल्लेख्य रूपमा वृद्धि भएको तथ्यांक पनि सार्वजनिक गरिएको थियो।

अस्पतालले सुरक्षित मातृत्व, परिवार नियोजन, हेमोडायलाइसिस, आयुर्वेद सेवा तथा सामाजिक सेवा इकाइमार्फत गरिब, असहाय तथा विपन्न नागरिकलाई सहुलियतमा सेवा उपलब्ध गराउँदै आएको जनाएको छ।

यसैगरी अस्पतालले सेवा विस्तार गर्दै १०० शय्यामा स्तरोन्नति गर्ने, ICU तथा SNCU सेवा विस्तार गर्ने, CT Scan र MRI सेवा सञ्चालन गर्ने योजना अघि सारेको छ। यद्यपि जनशक्ति अभाव, भौतिक संरचनाको कमी, औषधि आपूर्तिमा समस्या तथा स्वास्थ्य बीमाको भुक्तानीमा ढिलाइ जस्ता चुनौतीहरू अझै कायम रहेको उल्लेख गरिएको छ।

कार्यक्रममा सहभागी पत्रकारहरूले उठाएका जिज्ञासा तथा सुझावलाई समेट्दै अस्पतालले सेवा थप प्रभावकारी र पारदर्शी बनाउने प्रतिबद्धता जनाएको छ। साथै, अस्पतालले कार्यक्रम सफल बनाउन सहयोग गर्ने सबैप्रति धन्यवाद व्यक्त गरेको छ।