२२ वैशाख २०८०
विराज त्रिपाठी
प्रसिद्ध धार्मिक स्थल गोरखनाथ गुफामा आज देखि जेठ १ गतेसम्म चल्ने २० औँ सवालाख रोट महोत्सव सुरु भएको छ । रथ यात्रामा एकसय आठ कन्याहरू, नाथयोगी, भक्तजन लगायतको सहभागितामा गोरखाको सिद्धाश्रम शक्ति केन्द्रबाट बिहान ९ बजे देखि सुरुवात गरिएको यात्रामा बाजागाजासहित गोरखा बजारबाट गोरखनाथ मन्दिरसम्म रथयात्रा गरिएको छ ।
सिद्धाश्रम शक्ति केन्द्रको आयोजनामा हरेक बर्ष गोरखामा गुरु गोरखनाथ प्रकट भएको दिनको अबसरमा आज बाट सुरुवात भएको सवालाख रोट महोत्सवमा गुरु गोरखनाथको बिशेष पूजासहित रोट चढाउने, देवी देवताको पूजा, बिशेष हवन, भजनकीर्तन लगायतका गतिविधिहरु गर्ने गरिन्छ ।
भक्तजनहरुले गोरखनाथलाई खुशी बनाउन गोरखा दरबारमा रहेको गोरखनाथ मन्दिरमा गोरखनाथलाई सबैभन्दा बढि मनपर्ने खाद्य वस्तुको रुपमा गहुँ, जौ र धेरैजसो चामलको पिठोमा विभिन्न ५२ थरीका शक्तिबर्दका मसला मिसाएर रोट बनाइन्छ। रोटमा जाइफल, काजु, ल्वाङ, सुकुमेल, दाख, चिनी, खुदो, नरिबल जस्ता किसमिस मिसाइन्छ। नाथहरु शुद्ध भइ पिठोमा किसमिस मिसाएर रोटलाई स-सना गोली बनाउँदै घ्यूमा पोल्ने गर्छन्।
