गोरखाको ८ वटा पालिकाको एकसय वटा विद्यालयमा रुम टु रिड कार्यक्रम लागु भएको छ । बालिका शिक्षा कार्यक्रम भने १४ वटा विद्यालयमा लागु भएको परियोजनाका सिनियर कार्यक्रम अधिकृत एलबी खड्काले जानकारी दिनु भयो ।
कार्यक्रम लागु भएका विद्यालयको कक्षाकोठाभित्रै बुक कर्नर छन् । उनीहरुले पाठ्यपुस्तक बाहेकका किताब पनि पढ्न पाउँछन् । चित्र सहितको किताब पढ्न पाउँदा उनीहरु खुसी हुने गरेको अनुभव शिक्षकहरु सुनाउछन ।
शिक्षकको क्षमता विकासका लागि तालिम, कक्षाकोठा तथा पुस्तकालय केन्द्रित गतिविधिलाई चुस्त दुरुस्त राख्नका लागि सहजकर्ताबाट नियमित अनुगमन तथा सहयोगले विद्यालयमा साक्षर वातावरण सिर्जना गर्न मद्दत पुगेको उहाले जानकारी दिनुभयो ।
सो कार्यक्रम अन्तरगत आर्थिक अवस्था कमजोर भएका बालबालिकाहरुलाई शैक्षिक सामग्रीहरु पनि उपलब्ध गराउदै आएको छ । त्यस्तै, बालिका शिक्षा लागु भएको विद्यालयहरुमा बालिकाहरुलाई जीवनउपयोगी, सकारात्मक सोचको विकास गर्ने, सहि निर्णय लिन सक्ने क्षमताका विकास गर्ने र सामाजिक उत्तरदायित्वको भावना विकास गर्ने खालका ज्ञान दिने बालिका शिक्षा कार्यक्रम अधिकृत ज्योति आचार्यले बताईन् ।
रुट टु रिड परियोजनाले साक्षरता, बालिका शिक्षा कार्यक्रम लागु भएका विभिन्न विद्यालयका शिक्षकहरुलाई तालिम र विद्यार्थीलाई आवश्यक शैक्षिक सामग्री सहयोग गर्ने गरेको छ । गोरखा नगरपालिका, पालुङ्टार नगरपालिका, अजिरकोट, सिरानचोक, भिमसेन थापा, गण्डकी, शहिद लखन र बारपाक सुलिकोट गाउँपालिकामा साक्षरता कार्यक्रम संचालन भएको छ । रुम टु रिड द्धारा संचालित यो परियोजना गोरखामा एकिकरण नेपालको सहकार्यमा विद्यालयले कार्यान्वयन गरिरहेको छ । 
रुम टु रिडका सिनियर कार्यक्रम अधिकृत एलपी खड्काले तिन चरणमा ६ जना शिक्षकलाई तालिम दिएको बताउनु भयो । उहाका अनुसार जिल्लाभर १४ जना साक्षरता सहजकर्ताका रुपमा खटिएका छन् ।
न्यून आय भएका समुदायका बालबालिकामा साक्षरता सीप र पढ्ने बानीको विकास तथा बालिकाहरूका लागि जीवन उपयोगी सीप विकासमा रुम टु रिडले काम गरिरहेको जनाएको छ ।
