गोरखाका विभिन्न सडक निर्माण तथा स्तरोन्नतिका लागि संघ सरकारले ९८ करोड ७३ लाख रकम विनियोजन गरेको छ ।
आगामि आर्थिक बर्ष २०८०÷०८१ मा ११ किलो छेपेटार भालुस्वाँरा बारपाक सडक योजना कार्यालयबाट कार्यान्वयन गर्ने गरी सो बजेट प्राप्त भएको योजना कार्यालयले जनाएको हो । कार्यालयका अनुसार सबैभन्दा धेरै रकम बैकल्पिक सहायक राजमार्ग बिकास कार्यक्रम अन्तरगत परेको छ । सो शीर्षकमा ५४ करोड ६० लाख रकम प्राप्त भएको छ ।
त्यस्तै बारपाक सडकका लागि २३ करोड ८४ लाख र बेनिघाट आरुघाट लार्के सडकका लागि १५ करोड रकम विनियोजन भएको छ । स्थानीय सडक पुल अन्तरगत २ करोड २७ लाख, निर्वाचन क्षेत्र रणनीतिक सडकका लागि २ करोड र रणनीतिक सडक पुल अन्तरगत १ करोड २ लाख रकम विनियोजन भएको सो योजना कार्यालयले जनाएको छ । ५४ करोड ६० लाखको बैकल्पिक सहायक राजमार्ग बिकास कार्यक्रम अन्तरगत ४१ वटा योजना छन् । ती सबै योजना संघीय सरकार अन्तरगतको ११ किलो छेपेटार भालुस्वाँरा बारपाक सडक योजनामार्फत कार्यान्वयन हुने बताइएको छ । छनोट भएका योजनामा दश लाखदेखि पाँच करोडसम्मका रहेको कार्यालयका इन्जिनियर गोविन्द श्रेष्ठले बताउनुभयो ।
कार्यालयले बजेट विनियोजन भएका योजनाको डिपिआर तथा वातावरण प्रभाव मूल्याकंन (आइइइ/इआइए) भए नभएको विवरण माग गरेको छ । पूर्वाधार बिकास कार्यालय सहित जिल्लाका सबै स्थानीय तहलाई पत्राचार गर्दै कार्यालयले उक्त सडकमा वन क्षेत्र पर्ने नपर्ने, सडकले जोड्ने पालिका र वडा लगायतका विवरण सात दिनभित्र उपलब्ध गराउन आग्रह गरेको छ । योजनामा दोहोरोपना नल्याउनका लागि विवरण माग गरिएको कार्यालयका इन्जिनियर श्रेष्ठले बताउनु भएको छ ।
