पोखरा, साउन २७ । कञ्चन पत्रकारिता पुरस्कार २०८२ कास्कीका फोटो पत्रकार राम गुरुङ र गोरखाका पत्रकार कैलाशबाबु श्रेष्ठ (सुशिल)लाई प्रदान गरिएको छ।
व्यवसायी बिमलमान गुभाजू र परिवारले आफ्ना दिवंगत आमा–बाबुको स्मृतिमा स्थापना गरेको पुरस्कार नेपाल आदिवासी जनजाति पत्रकार महासंघ (फोनिज) गण्डकीले मंगलबार पोखरामा आयोजित समारोहमा प्रदान गरेको हो। सम्मान स्वरूप दुवै पत्रकारलाई दोसल्ला, सम्मानपत्र र २५ हजार रुपैयाँ नगद प्रदान गरिएको थियो।
कार्यक्रममा पोखरा महानगर प्रमुख धनराज आचार्य, पुरस्कारदाता बिमलमान गुभाजू, फोनिज गण्डकी अध्यक्ष खीमा गुरुङलगायतले सम्मान गरेका थिए। २६औं फोनिज स्थापना दिवसको अवसरमा प्रदान गरिएको यो पुरस्कार पत्रकारितामा सक्रिय दुई व्यक्तित्वलाई हरेक वर्ष दिइँदै आएको छ।
प्रमुख आचार्यले पुरस्कार निरन्तर मेहनतको परिणाम भएको उल्लेख गर्दै यसले पत्रकारितामा थप हौसला दिने बताए। सम्मानित पत्रकार श्रेष्ठले पत्रकारिता पेसामा विगतदेखि अहिलेसम्म धेरै परिवर्तन आएको बताउँदा, फोटो पत्रकार गुरुङले पुरस्कारले निरन्तर क्रियाशील रहन प्रेरणा मिलेको प्रतिक्रिया दिए।
कार्यक्रममा गण्डकी प्रदेशका प्रेस रजिष्ट्रार बिमला भण्डारी, पत्रकार महासंघ गण्डकी अध्यक्ष रमेश पौडेलसहितका वक्ताले निष्पक्ष र पारदर्शी पत्रकारिताको आवश्यकता औंल्याए।
२०७७ सालमा स्थापना भएको कञ्चन पत्रकारिता पुरस्कारबाट यसअघि १० जना पत्रकार सम्मानित भइसकेका छन्।
