गोरखा । गोरखामा ट्रकको ठक्करबाट एक पुरुषको मृत्यु भएको छ। उदयपुर जिल्ला बेलका नगरपालिका–४ लालबजार घर भएका ४० वर्षीय दीपक कुमार राईको ज्यान गएको जिल्ला प्रहरी कार्यालय गोरखाले जनाएको छ।
प्रहरीका अनुसार हिजो राति करिब ७:३० बजे बारपाक सुलिकोट गाउँपालिका–२ को सनान भन्ने स्थानमा बारपाक बजारबाट लाप्राकतर्फ जाँदै गरेको ना. ५ ख ९२७१ नम्बरको ट्रकले सडकको काम गरिरहेका राईलाई ठक्कर दिएको थियो। गम्भीर घाइते राईको उपचारका क्रममा चितवनस्थित पुरानो मेडिकल कलेजमा मृत्यु भएको हो।
ट्रक र चालक गोरखा जिल्ला सहिदलखन गाउँपालिका–७ बुङकोट घर भएका ३३ वर्षीय इन्द्रबहादुर बिकलाई प्रहरीले नियन्त्रणमा लिएको छ।
