पृथ्वी राजमार्गअन्तर्गत मलेखु–मुग्लिन खण्डको (३९ किलोमिटर) सडक स्तरोन्नति गर्नका लागि साढे ६ अर्ब रूपैयाँ अनुमानित गरिएकोमा ठेकेदार कम्पनीले ४ अर्ब ८० करोड लागतमा ठेक्का हात पारेको छ । संघीय सरकारले नागढुंगा–नौबिसे–मुलेखु–मुग्लिन सडक खण्डलाई तीन खण्डमा विभाजन गरेर सडक स्तरोन्नति गर्न लागेको हो।
नागढुंगा-नौबिसे–मलेखु–मुग्लिन सडक विस्तार अन्तर्गतको यो खण्डको स्तरोन्नति गर्न शर्मा-जेडआईसी संयुक्त उपक्रम(जेभी) ले ९ वटा कम्पनीमध्ये सबैभन्दा कम कबोल ४ अर्ब ८० करोड ५९ लाख रूपैयाँमा ठेक्का पारेको हो ।
यो सडक खण्डको प्राविधिक मूल्यांकनमा ३५ वटा कम्पनी छनोट भएका मध्ये ९ वटा कम्पनी मात्रै आर्थिक मूल्यांकनमा सहभागिता जनाएका थिए।
ठेकेदार कम्पनीले ३ वर्ष भित्रै मलेखु-मुग्लिनसम्मको सडक स्तरोन्नतिको काम सम्पन्न गर्नुपर्ने समयसीमा तोकिएको छ । ठेकेदार कम्पनीले तीन वर्षभित्रै दुई लेनसहितको सडक चौडा गर्ने जिम्मेवारी पाएको छ, छनोट भएको कम्पनीले सो सडक खण्ड ५ वर्षसम्म नियमित मर्मतसम्भार पनि गर्नुपर्नेछ। यो सडक खण्ड बजार क्षेत्रमा ६ लेनका सडक स्तरोन्नति गरिनेछ । त्यसैगरी अन्यन्तै साँघुरो भएको खण्डमा भने दुई लेनको विस्तार गरिनेछ।
