गोरखा । पालुङटार नगरपालिकाले नगरभित्रका सामुदायिक विद्यालयमा अध्ययनरत ४ हजार ५८२ जना विद्यार्थीको सामूहिक दुर्घटना बिमा गरेको छ।
विद्यार्थीको स्वास्थ्य सुरक्षा र दुर्घटनाबाट हुन सक्ने आर्थिक जोखिम न्यूनीकरण गर्ने उद्देश्यले नगरपालिकाले आइजिआई प्रुडेन्सियल इन्स्योरेन्स कम्पनी लिमिटेडसँग सम्झौता गरी बिमा कार्यक्रम लागू गरेको नगरप्रमुख विवस चिन्तनले जानकारी दिए।
सम्झौताअनुसार नगरभित्रका सामुदायिक विद्यालयका विद्यार्थी दुर्घटनामा परेमा अधिकतम ७० हजार रुपैयाँसम्मको बिमा सुविधा उपलब्ध हुनेछ।
बिमा कार्यक्रमका लागि नगरपालिकाले प्रति विद्यार्थी १०५ रुपैयाँ बिमा शुल्क र २० रुपैयाँ टिकट शुल्क व्यहोर्ने व्यवस्था गरेको छ। बिमा दाबी भुक्तानी भने कम्पनीको नियमअनुसार हुने जनाइएको छ।
नगरपालिकाका अनुसार यस कार्यक्रमले विद्यार्थी र अभिभावकको आर्थिक जोखिम कम गर्नुका साथै सामुदायिक विद्यालयप्रति आकर्षण बढाउन पनि सहयोग पुग्ने अपेक्षा गरिएको छ।
