मकवानपुर । मकवानपुर जिल्ला हेटौंडा उपमहानगरपालिका १६ मा १२ बर्षिय बालकको शव फेला परेको छ । हात बांधिएको शव झुन्डिएको अवस्थामा भेटिएपछि प्रहरीले २ जनालाई हत्या आशंकामा नियन्त्रणमा लिएको छ ।
जिल्ला प्रहरी कार्यालय मकवानपुरका अनुसार १२ वर्षीया बालकको आत्महत्या नभई हत्या भएको हुनसक्ने आशंकामा अनुसन्धान अगाडि बढाएको छ । घटना हेटौँडा–१६, स्थित हटिया नजिक बाबेडाँडाको हो । मुस्कान भनिने सुजन थिङ स्थानीय सामुदायिक वनभित्र रुखमा हात बाँधिएको अवस्थामा झुण्डिएको फेला परेको मकवानपुरका प्रहरी नायव उपरीक्षक टेकबहादुर कार्कीले बताउनु भयो ।
बालकको हत्या भएको आशंकामा प्रहरीले सोधपुछका लागि स्थानीय दुई जनालाई नियन्त्रणमा लिएको छ । उनीहरूको नाम भने प्रहरीले खुलाएको छैन । डीएसपी कार्कीले दुई जनालाई हिरासतमा राखेर सोधपुछ भइरहेको जानकारी दिनुभयो ।
‘बालक झुण्डिको अवस्थामा फेला परेको हो, पोष्टमार्टम रिपोर्टपछि थप विषय खुल्छ” कार्कीले भन्नुभयो । बालकको घरबाट करिब २ सय मिटरको दुरीमा रहेको सामुदायिक वनको रुखमा कपडाको डोरीको पासो लगाई बालक झुण्डिएको खबर स्थानीयले प्रहरीलाई गराएका थिए । खबर आउना साथ प्रहरी घटना स्थल पुगेको कार्कीले बताए । बालकको शव पोस्टमार्टमका लागि हेटौंडा अस्पताल ल्याइएको छ ।
