२५ वैशाख २०८०
गोरखा स्थित चुमनुब्री गा.पा. वडा नं.४ नामरुङ बस्ने ५९ बर्षका छिरिङ धुनडुपले सोही स्थानमा बस्ने दोर्जे घ्याल्जेनलाई मिति २०८०।०१।१७ गते बिहान करिब ५:०० बजेको समयमा धारिलो हतियार चक्कु प्रहार गरी मारेको स्थानीयले जनाएको छ ।
जिल्ला प्रहरी कार्यालय गोरखाका अनुसार घ्याल्जेन आफ्नै घर कोठामा मृत अवस्थामा फेला परेको र घाँटीको अगाडिको भागमा धारिलो हतियारले प्रहार गरेको जस्तो चोट देखिएको भन्दै स्थानीयबासीको खबरबाट जिल्ला प्रहरी कार्यालय गोरखा तथा ईलाका प्रहरी कार्यालय आरुघाट गोरखाबाट प्रहरी निरीक्षक रामजी देवकोटाको कमाण्डमा टोली घटनास्थलमा खटीएको जनाएको छ ।
साथै हत्याको थप अनुसन्धान गर्दै जाँदा छिरिङ धुनडुपले धारिलो हतियार चक्कुले दोर्जे घ्याल्जेनको घाँटीको अगाडिको भागमा प्रहार गरी मारेको खुल्न आए पस्चात छिरिङ धुनडुपलाई भौगोलिक विकटताको बावजुद पनि जिल्ला गोरखा चुमनुब्री गा.पा. वडा नं.४ नामरुङ बाट मिति २०८०।०१।२३ गते पक्राउ गरेको जिल्ला प्रहरी कार्यालय गोरखाले जनाएको छ ।
हाल धुनडुपलाई कर्तव्य ज्यान शीर्षकमा मुद्दा दर्ता गरी हिरासतमा राखी अनुसन्धान गर्न गोरखा जिल्ला अदालत गोरखाबाट म्याद अनुमती लिई उक्त घटना सम्बन्धमा जिल्ला प्रहरी कार्यालय गोरखाबाट थप अनुसन्धान कार्य भई रहेको कार्यालयले जानकारी दिएको हो ।
