गोरखा । गोरखा सदरमुकाममा अरिंगालले चिल्दा एक पुरुष घाइते भएका छन् । पालुङटार नगरपालिका–१ का स्थायी बासिन्दा तथा हाल गोरखा नगरपालिका–६, सरस्वती मार्ग बस्दै आएका ४५ वर्षीय सन्त बहादुर लामा अरिंगालले चिल्दा घाइते भएका हुन् ।
घरभित्र जस्तापातामा टाँसिएको गोलो वर्षाको कारण खसेपछि अतालिएको अरिंगालले लामामाथि आक्रमण गरेको परिवारले जनाएको छ । कम्तीमा ३० वटा अरिंगालले चिल्दा लामा गम्भीर घाइते भएका छन् ।
उनी अहिले गोरखा अस्पतालमा उपचाररत छन् । उनको रगत पातलो भएकाले बाक्लो बनाउन औषधि प्रयोग भइरहेको अस्पताल प्रशासनले जानकारी दिएको छ ।
अस्पतालका अनुसार, बेलुकी ४ बजेसम्म अवस्थामा सुधार नआए थप उपचारका लागि उनलाई अन्य स्वास्थ्य संस्थामा रेफर गरिनेछ ।
