साउन २ । सप्तरीको कञ्चनरूप नगरपालिकामा एक नाबालिगमाथि सामूहिक बलात्कार भएको छ। वडा नम्बर १२ धर्मपुर टोलमा गत शुक्रबार राति १७ वर्षीया नाबालिगमाथि बलात्कार भएको हो।
बलात्कार घटनाका योजनाकार कञ्चनरूप नगरपालिका-१२ का ४१ वर्षीय कैलाश पोखरेल सहित २४ वर्षीय सुदीप भुजेल, २२ वर्षीय मनोज विश्वकर्मा र २१ वर्षीय दीपेश सुवेदीलाई पक्राउ गरिएको इलाका प्रहरी कार्यालय कञ्चनपुरका प्रहरी नायब उपरीक्षक दीपककुमार राईले जानकारी दिए।
राईका अनुसार शुक्रबार मध्यराति ती नाबालिगको घरमै पसेर चारै जनाले कोही नबस्ने छेउको सोमबहादुर मगरको घरमा लगी कैलाशको निर्देशनमा खुकुरी देखाउँदै धम्की दिंदै पालैपालो बलात्कार गरेका थिए ।
कैलाशले नै सुदीप, मनोज र दीपेशलाई निर्देशन दिई आफ्नै अगाडि बलात्कार गर्न लगाएको बयानबाट खुल्न आएको प्रहरी स्रोतले बताएको छ।
घटनापछि नाबालिग र उनका अभिभावकले जाहेरी दिएका थिए।
