ईअस्त्र । चीनले जारी गरेको नयाँ नक्सामा भारतको अरुणाचल प्रदेशलाई आफ्नै भूमिको रुपमा समेटेको छ ।
बीबीसी नेपालीले उल्लेख गरेअनुसार चीनले जारी गरेको नयाँ नक्सालाई चीनले ‘स्ट्यान्डर्ड म्याप’ को रुपमा जनाएको छ । चीनले सोमबार जारी गरेको नयाँ नक्साअनुसार अरुणाचल प्रदेश चीनमा पर्छ । चीनले उक्त नक्सामा दक्षिणी चाइना सागर, ताइवानलाई पनि आफ्नै भूमि भएको बीबीसीले जनाएको छ ।
उक्त नक्सा सार्वजनिक गर्दै चीनको सत्तारुढ कम्युनिस्ट पार्टीको मुखपत्र मानिने अङ्ग्रेजी दैनिक द ग्लोबल टाइम्सले सामाजिक सञ्जालमा लेखेको छ: “चीनको सन् २०२३ को प्रचलित नक्सा सोमवार सार्वजनिक गरिएको छ। यस नक्सा प्राकृतिक स्रोत मन्त्रालयको वेबसाइटमा सार्वजनिक गरिएको हो। यो नक्सा चीन र विश्वका अन्य देशको ‘ड्रइङ’ पद्धतिको आधारमा बनाइएको हो।”
केही दिनअघि ब्रिक्स सम्मेलनका क्रममा प्रधानमन्त्री नरेन्द्र मोदी र चिनियाँ राष्ट्रपति सी जिन्पिङबीच भेटवार्ता भएको पृष्ठभूमिमा यो नक्सा जारी गरिएको हो।
दुवै देशका नेताबीच सीमा विवादबारे समेत कुराकानी भएको थियो ।
