१९ चैत २०८०, सोमवार
गोरखा । आत्महत्या गर्न दुरुत्साहन गरेको मुद्दामा संलग्न ४ जनालाई सोमबार प्रहरीले पक्राउ गरेको छ ।
पक्राउ पर्नेहरूमा सिरानचोक गाउँपालिका-७ सिम्ले बस्ने ५५ वर्षीय बुद्धि कुमारी गुरुङ सोही ठाउँका ६० वर्षीय रुप काजी भन्ने सन्त बहादुर गुरुङ, ४५ वर्षीय मिनु गुरुङ र ४५ वर्षीय पुष्पा कुमारी गुरुङ रहेका जिल्ला प्रहरी कार्यालय गोरखाका प्रबक्ता प्रहरी नायव उपरीक्षक रमेश कुमार श्रेष्ठले बताए ।
सिरान्चोक गाउँपालिका-७ बस्ने मन बहादुर खड्काले चैत १७ गते विहान सोही गाउँपालिका-७ अमिले डाँडा भन्ने स्थानमा खनायोको रुखको हाँगामा डोरीको पाँसो लगाई झुण्डि मृत अवस्थामा फेला परेको थियो ।
उक्त घटना सम्बन्धमा जिल्ला प्रहरी कार्यालय गोरखामा आत्महत्या गर्न दुरूत्साहन गरेको मुद्दाको मृतकको छोरा मार्फत जाहेरी परेकोमा उक्त कार्यालयबाट खटिएको प्रहरीले घटनामा संलग्न बुद्धि कुमारी गुरुङ, रुप काजी भन्ने सन्त बहादुर गुरुङ, मिनु गुरुङ र पुष्पा कुमारी गुरुङलाई चैत १८ गते पक्राउ गरेको हो ।
उनीहरू उपर जिल्ला अदालत गोरखाबाट आत्महत्या गर्न दुरुत्साहन गरेको मुद्दामा म्याद थप अनुमति लिई प्रहरीबाट थप अनुसन्धान कार्य भइरहेको छ ।
