१३ साउन । अहिले सामाजिक सञ्जालमा एक महिला महाकाली नदीमा हाम फालेको भिडियो देखापरिरहेको छ । यो घटना दार्चुलाको हो ।
जिल्ला प्रहरी कार्यालय दार्चुलाका प्रवक्ता ज्ञानेन्द्र सिंहका अनुसार शनिबार साँझ दुहु गाउँपालिका-४ थारा बस्ने १७ वर्षिया धनिसा कुँवरले सदरमुकाम खलङ्गास्थित रिङ्नेताल भन्ने ठाउँबाट नदीमा हाम फालेकी थिइन् ।
प्रहरीका अनुसार उनी हाम फाल्न भनेर नदीको डिलमा पुगेको भनेर स्थानीयले खबर गरेका थिए । लगत्तै प्रहरी टोली खटिएको थियो । प्रहरी र स्थानीयले उनलाई सम्झाइबुझाइ गरेका थिए । तर, नमानेपछि उनलाई समात्न एक प्रहरी नजिकै गएका थिए । त्यही बेला कुँवरले नदीमा हाम फालेकी थिइन् ।
लगत्तै खोजीकार्य सुरु गरे पनि उनी फेला नपरेकी प्रहरीले जनाएको छ । उनको घरका परिवारका सदस्यहरुसँग बुझ्दा पनि उनी हाम फाल्नुको कारण नखुलेको दार्चुला प्रहरी प्रवक्ता सिंहले जानकारी दिएका छन् ।
