गोरखा । पूर्वराजा ज्ञानेन्द्र शाह यसै साता गोरखा जाने भएका छन्। गोरखास्थित गोरखनाथ, गोरखकाली तथा मनकामना मन्दिरमा पूजा अर्चना गर्ने उद्देश्यले उनी गोरखा जान लागेका हुन्।
सम्बाद सचिव डा. फणीराज पाठकले बुधबार सूचना जारी गर्दै पूर्वराजाले धार्मिक अनुष्ठानका लागि गोरखा जाने जानकारी गराएका छन्।
प्रजातन्त्र दिवसका अवसरमा पूर्वराजा शाहले दिएको अभिव्यक्ति र पछिल्लो समय राजावादीहरूका गतिविधिका कारण मुलुकको राजनीति तरङ्गित भइरहेको बेला उनको गोरखा यात्रा महत्वपूर्ण रूपमा हेरिएको छ।
पूर्वराजा शाह पछिल्लो समय विभिन्न धार्मिक तथा सामाजिक कार्यक्रममा सक्रिय देखिएका छन्। गोरखा यात्राले पनि राजनीतिक तथा सामाजिक रूपमा नयाँ सन्देश दिने अनुमान गरिएको छ।
