गोरखा । सिरानचोक गाउँपालिकामा रहेका ४१ वटा विद्यालयका प्रधानाध्यापकबीच ‘समय विचलन र हाम्रा चाडपर्व’ विषयक अन्तरक्रिया कार्यक्रम सम्पन्न भएको छ ।
पर्व समय सुधार राष्ट्रिय समाज, जिल्ला समिति गोरखाको आयोजनामा चोरकाटेमा आयोजित कार्यक्रममा हिन्दु नेपाली समाजका चाडपर्वमा देखिएका समयसम्बन्धी विचलनबारे विस्तृत जानकारी दिइएको थियो ।
जिल्ला अध्यक्ष तुलसा मरहट्टाका अनुसार पछिल्लो समय नेपाल सरकारले पर्व सुधार राष्ट्रिय कार्यान्वयन समिति बनाएर बिक्रम सम्बतको महिनामा देखिएका विकृति सच्याउने कार्यलाई अघि बढाइरहेको छ । यसै क्रममा विभिन्न जिल्लामा यस्ता अन्तरक्रिया कार्यक्रम भइरहेको उनले बताइन् ।
कार्यक्रममा पोखरा विश्वविद्यालयका उपप्राध्यापक कल्याण पन्त र पर्व सुधार राष्ट्रिय कार्यान्वयन समितिका सचिव हरी नारायण मल्लले वर्षको आरम्भ, बिक्रम सम्बतमा देखिएका विकृति, तिथि–मिति निर्धारणमा पञ्चाङ्ग निर्णायक समितिको कमजोरीलगायत विषयमा सहभागीहरुलाई प्रशिक्षण दिएका थिए ।
अन्तरक्रियामा सहभागी प्रधानाध्यापकहरूले चाडपर्वलाई एकरुपता दिने र भ्रम रहित ढङ्गले पालना गर्न यस्ता कार्यक्रम उपयोगी भएको धारणा राखेका थिए ।
