गोरखा । मनास्लु क्षेत्रमा एक विदेशी पर्यटक पहिरोमा पुरिएकी छन्। चुमनुब्री गाउँपालिका–३ न्याकफेदी नजिकै शुक्रबार दिउँसो झरेको पहिरोले चेक रिपब्लिककी ५४ वर्षीया क्याटरिना रस्कोभालाई पुरेको गाइड रमेश भट्टले जानकारी दिए।
उनका अनुसार दिउँसो करिब २ बजेतिर भीरबाट खसेको ढुंगाले रस्कोभालाई पुरेको हो। “टाउकोमात्र देखिएको छ, उहाँको श्रीमान् र मचाहिँ सकुशल छौँ,” भट्टले भने।
घटनाको समयमा त्यहाँ ठूलो पर्यटक समूह रहेको भए पनि लगातार पहिरो खस्ने डरले तत्काल उद्धार प्रयास गर्न नसकिएको उनले बताए।
सहायक प्रमुख जिल्ला अधिकारी चित्राङ्गद बरालका अनुसार घटनास्थल बस्तीदेखि निकै टाढा रहेको र उद्धारका लागि फिलिम चौकीबाट प्रहरी टोली पठाइएको छ।
