गोरखा । शहिद लखन गाउँपालिका–६ घैरुङ पिपलछापको खेलमैदानमा माघेसक्रान्ति मेला २०८२ आयोजना हुने भएको छ। हिमालय देवी युवा क्लबको आयोजनामा पुस २६ देखि माघ १ गतेसम्म मेला सञ्चालन हुनेछ।
मौलिक संस्कार–संस्कृतिको संरक्षण र खेलकुद विकास उद्देश्यले आयोजना हुने मेलामा १५ हल गोरु जुधाइ, बाह्रौं शहिद लखन हिमालय देवी कप फुटबल प्रतियोगिता, दौड, हस्तकला प्रतियोगिता, कृषि तथा पशु प्रदर्शनी र विविध सांस्कृतिक कार्यक्रम मुख्य आकर्षण रहने क्लबका अध्यक्ष केशरबहादुर गुरुङले जानकारी दिए।
माघ १ गते हुने गोरु जुधाइमा ए र बी ग्रेड गरी दुई चरणमा प्रतिस्पर्धा हुनेछ। ए ग्रेड विजेताले १५ हजार र उपविजेताले १० हजार तथा बी ग्रेड विजेताले ८ हजार र उपविजेताले ७ हजार रुपैयाँ पुरस्कार पाउनेछन्।
फुटबलतर्फ प्रथमले १ लाख ५० हजार र द्वितीयले ७५ हजार रुपैयाँ पुरस्कार प्राप्त गर्नेछन्। उत्कृष्ट खेलाडी, गोलरक्षक र सर्वाधिक गोलकर्तालाई ५/५ हजार नगद प्रदान गरिनेछ। टोली दर्ता पुस २५ गतेसम्म गर्न सकिने आयोजकले जनाएको छ।
