ओखलढुंगा । रामेछापस्थित तामाकोसी नदीमा बस खस्दा ६ जनाको मृत्यु भएको छ। मंगलबार बिहान काठमाडौँबाट ओखलढुंगा जाँदै गरेको प्रदेश ३–०१–००५ ख ९९७५ नम्बरको बस मन्थली नगरपालिका–६ त्रिवेणी घाट नजिक दुर्घटना भएको हो।
सशस्त्र प्रहरीका अनुसार दुर्घटनामा परी ५ जना घाइते भएका छन्। घाइतेहरुलाई उपचारका लागि जिल्ला अस्पताल खुर्कोट पठाइएको छ। दुर्घटनामा मृत्यु हुनेमध्ये २ जना पुरुष र ४ जना महिला रहेका छन्, मृतकहरुको सनाखत हुन बाँकी छ।
बस सडकबाट करिब २० मिटर तल तामाकोसी नदीमा खसेको थियो। उद्धारका लागि सशस्त्र प्रहरी बल नेपाल र नेपाल प्रहरीको संयुक्त टोली परिचालन गरिएको छ। बसमा कति जना सवार थिए भन्ने खुल्न बाँकी रहेको र उद्धार कार्य जारी रहेको प्रहरीले जनाएको छ।
