धनगढीबाट बैतडीतर्फ जाँदै गरेको यात्रुबाहक बस शुक्रबार अपराह्न बैतडीमा दुर्घटना भएको छ।
सुपप्र ०१–००१ ख ३९६३ नम्बरको बस बैतडीको पाटन नगरपालिका–८ गैराखान क्षेत्रमा सडकबाट करिब २०० मिटर तल खसेको जिल्ला प्रहरी कार्यालय बैतडीले जनाएको छ।
घटनास्थलमा रहेका वडाध्यक्ष हरिश विष्टका अनुसार हालसम्म १६ जना घाइतेको उद्धार गरिएको छ। घाइतेहरूको उद्धार तथा उपचारका लागि आवश्यक व्यवस्था भइरहेको छ।
नेपाल प्रहरी, सशस्त्र प्रहरी र स्थानीय बासिन्दा उद्धार कार्यमा खटिएका छन्। दुर्घटनाको कारण तथा बसमा सवार यात्रुको संख्या लगायत विस्तृत विवरण आउन बाँकी रहेको प्रहरीले जनाएको छ।
