गोरखा। गोरखाको शहीद लखन गाउँपालिका–४ ताक्लुङ, बाँझोगरामा ८५ वर्षीया दिलमाया रानाको गरगहना लुटिएको घटनामा प्रहरीले एक जनालाई नियन्त्रणमा लिएको छ।
जिल्ला प्रहरी कार्यालय गोरखाका अनुसार असार २३ गते राति करिब १०:३० बजे घरभित्र सुतिरहेको अवस्थामा अज्ञात व्यक्तिले कानमा लगाएको सुनको रिङ लुटेर फरार भएको थियो। घटनापछि प्रहरीले अनुसन्धान अघि बढाएको थियो।
अनुसन्धानका क्रममा पीडितकै साँहिलि बुहारी, सोही स्थानका ३५ वर्षीय झर्ना राना संलग्न रहेको खुलेको प्रहरीले जनाएको छ। उनको साथबाट लुटिएको सुनको रिङ (थान–२) समेत बरामद गरिएको छ।
प्रहरीले झर्ना रानालाई नियन्त्रणमा लिएर घटनाबारे थप अनुसन्धान भइरहेको जनाएको छ।
