गोरखा। गोरखाको स्याउली बजार–भट्टफाँट–मनकामना सडक अन्तर्गत निर्माण सम्पन्न भएको लुदी खोला मोटरेबल पुल उद्घाटन गरिएको छ।
करिब ८ महिनामै ७ करोड ५१ लाख रुपैयाँको लागतमा निर्माण सम्पन्न भएको ६० मिटर लामो पुलको गण्डकी प्रदेशका मुख्यमन्त्री सुरेन्द्रराज पाण्डेले शनिबार आयोजित कार्यक्रममा उद्घाटन गरेका हुन्।
पुल सञ्चालनमा आएपछि गोरखा नगरपालिका र शहीद लखन गाउँपालिकाबीचको आवागमन थप सहज भएको छ। साथै, प्रसिद्ध धार्मिक तथा पर्यटकीय गन्तव्य मनकामना मन्दिर पुग्ने भक्तजनका लागि पनि यात्रा सुरक्षित, छिटो र सहज बनेको भन्दै स्थानीयवासीले खुसी व्यक्त गरेका छन्।
