गोरखा नगरपालिका–१३ पाँचकिलोमा सोमबार दिउँसो बस र बोलेरो एकआपसमा ठोक्किँदा ६ जना घाइते भएका छन्।
दिउँसो करिब १:२० बजे सेराबाट आँबुखैरेनीतर्फ जाँदै गरेको ग २ ख ११४६ नम्बरको बस र विपरीत दिशाबाट आउँदै गरेको बागमती प्रदेश ०१–०२५ च ०७५८ नम्बरको बोलेरो ठोक्किएको प्रहरीले जनाएको छ।
दुर्घटनामा बोलेरो चालक सहिदलखन गाउँपालिका–१ बक्राङका ३४ वर्षीय विवश विकको छातीमा भित्री चोट लागेको छ। बोलेरोमा सवार २७ वर्षीय शंकर विश्वकर्माको मुखमा चोट लागेको छ भने उनकी १५ महिनाकी छोरी प्रभा विश्वकर्मा सामान्य अवस्थामा रहेकी छन्। बस चालक पालुङटार नगरपालिका–६ का करिब ३० वर्षीय मिलन गुरुङको बायाँ हातमा चोट लागेको छ। त्यसैगरी बसमा सवार गोरखा नगरपालिका–१३ देउरालीका ४२ वर्षीय कृष्णराम नराल र पालुङटार नगरपालिका–९ का ६५ वर्षीय होमबहादुर बानियाँ पनि घाइते भएका छन्।
सबै घाइतेलाई उपचारका लागि आँबुखैरेनी गाउँपालिका अस्पताल, तनहुँ पठाइएको प्रहरीले जनाएको छ। दुर्घटनापछि सडक एकतर्फी सञ्चालनमा रहेको छ भने दुवै सवारी चालकका कागजपत्र प्रहरीले नियन्त्रणमा लिएको छ।
