अजिरकोट गाउँपालिका–३ भच्चेकमा बृहत स्वास्थ्य शिविर संचालन हुने भएको छ । नेपाली सेनाको नम्वर ३ बाहिनी अड्डाको संयोजन, अजिरकोट गाउँपालिका र रिपुमर्दन गणको संयुक्त आयोजना तथा सैनिक अस्पताल पोखरा, जिल्ला अस्पताल गोरखा, जिल्ला स्वास्थ्य कार्यालय र गोरखा लायन्स आँखा सेवा केन्द्रको संयुक्त सहकार्यमा शिविर हुन लागेको हो ।
जेठ १९ र २० गते शिविर संचालन हुने छ । गाउँपालिका तथा इलाका आसपास बसोबास गर्ने विपन्न समुदायका सर्वसाधारण नागरिक, नेपाली सेनाबाट अवकाश प्राप्त भूपू सैनिक तथा तिनका आश्रित परिवारहरुलाई लक्षित गरी शिविर संचालन गर्न लागिएका रिपुमर्दन गणका गणपती हेम बिष्टले बताए । शिविरमा स्त्री रोग, दन्त रोग, हाड जोर्नी, नाक÷कान÷घाटी, आँखा सम्बन्धि रोग, चर्म रोग, जनरल ओपीडी तथा अन्य विविध रोगहरुको चेकजाँच हुने बताइएको छ । शिविरमा नेपाली सेना तथा जिल्ला अस्पताल गोरखाका बिशेषज्ञ डाक्टर तथा सहयोगीको रुपमा अन्य डाक्टरहरुले समेत स्वास्थ्य परिक्षण गर्नेछन् । नेपाली सेना र जनताबीचको सम्बन्धलाई थप सुमधुर बनाउने उद्देश्यले स्वास्थ्य शिविर गर्न लागिएको विष्टले जानकारी दिए ।
