माघ ९, गोरखा । गोरखामा मिस्टर वि. आठौं गोर्खाली रनिङ कप २०८० हुने भएको छ। सदरमुकाममा मंगलबार पत्रकार सम्मेलन गर्दै आयोजक हरमटारी क्लब गोरखाले आउँदो फागुन ६ गतेबाट १३ सम्म गोर्खाली रनिङकप आयोजना गर्ने घोषणा गरेको हो।
गोर्खाली रनिङ कपको बिजेता टिमले ३ लाख ३३ हजार ३ सय ३३ रुपैयाँ पुरस्कार पाउनेछ भने उप बिजेताले १ लाख ६६ हजार ६ सय ६६ रुपैयाँ पाउनेछ। गोरखाको लागि यो सर्वाधिक राशीको फुटबल प्रतियोगिता हो। प्रतियोगिता अवधिभर सर्वोकृष्ट खेलाडीलाई नगद २० हजार, सर्वोत्कृष्ट अग्रपंक्तिलाई र सर्वोत्कृष्ट मध्यपंक्ति, सर्वोत्कृष्ट गोलरक्षक, रक्षक, सर्वोत्कृष्ट गोलकर्तालाई पनि नगद १० हजार बराबरको दरले नगद दिने आयोजकले जनाएको छ। साथै यस बर्ष अनुशासित टिमलाई समेत ३५ हजार नगद पुरस्कार दिइने आयोजकले जनाएको छ ।
गोरखा सदरमुकामको हरमटारी खेलकुद मैदानमा हुन लागेको प्रतियोगितामा स्थानीय र राष्ट्रिय स्तरका क्लवहरु गरी १६ टिमको सहभागिता रहने आयोजको प्रक्षेपण छ। सहभागि हुन चाहने टिमले १५ हजार प्रवेश शुल्क तिर्नुपर्ने क्लवले जनाएको छ । विहान ७ बजेदेखि ११ बजेसम्म र दिउँसो १ बजे देखि ५ बजेसम्म नियमित प्रतियोगिता संचालन गरिने आयोजक हरमटारी क्लवका अध्यक्ष जीवन गुरुङले बताए।
यसअघि कोरोनाको प्रभावले २०७६/०७७ मा दुईवर्ष गोर्खाली रनिङ कप आयोजन गर्न नसकिएको र सातौं पनि सोचेको जस्तो गर्न नसकिएको क्लबले जनाएको छ।
मिस्टर वि. आठौं गोर्खाली रनिङ कप २०८० सम्पन्न गर्नका लागि करिब २७ लाख ७० हजार खर्च हुने महासचिव किरण ढकालले बताए। खेलकुदको माध्यमबाट व्यवसायिक गोर्खाली खेलाडी उत्पादन गर्न र जिल्लाको प्रचार प्रसारका लागि गोर्खाली रनिङ कप आयोजना गरिएको हरमटारी क्लबले जनाएको छ। मिस्टर वि. आठौं गोर्खाली रनिङ कप २०८० हेर्न आउने दर्शकले केही शुल्क दिनुपर्ने समेत क्लबले जनाएको छ ।
