गोरखा, वैशाख १९ । गण्डकी प्रदेशको पाँच जिल्लाका पाँच गाउँपालिकामा सञ्चालित बृद्विमुखी उद्यमशीलता र रोजगारी प्रवर्द्धन कार्यक्रम (GEEP) अन्तर्गत गोरखा जिल्लाको सिरानचोक गाउँपालिकाबाट छनोट गरिएका उत्कृष्ट ४० जना उद्यमीलाई आज एक विशेष समारोहका बीच सम्मान गरिएको छ।
उद्योग तथा पर्यटन मन्त्रालय गण्डकी प्रदेश, सिरानचोक गाउँपालिका र दायित्व नेपालद्वारा संयुक्त रूपमा सञ्चालित कार्यक्रममा पालिकाभित्रका १२५ जना सहभागीमध्ये उत्कृष्ट ४० उद्यमीलाई छनोट गरी सम्मान गरिएको हो।
कार्यक्रममा पालिकाका अध्यक्ष ज्ञानेन्द्र गुरुङ, वडा नं. ३ का अध्यक्ष जगदिश पोखरेल तथा दायित्व नेपाल गण्डकी प्रदेश संयोजक जुनतारा बुढा मगरले अबिर, माला र प्रमाणपत्रसहित उद्यमीहरूलाई सम्मान गरेका थिए।
संयोजक बुढा मगरका अनुसार सम्मानित ४० जना उद्यमीलाई शनिबार र आइतबार व्यवसायिक योजना निर्माणका लागि तालिम दिइनेछ। तालिमपछि उनीहरूले तयार पार्ने योजनाको मूल्यांकनका आधारमा थप उत्कृष्ट १० जनाको छनोट वैशाख २१ गते गरिनेछ।
यसका लागि पालिकाका प्रतिनिधि, स्थानीय शैक्षिक संस्था, बैंक, उद्योग वाणिज्य संघ र प्रशिक्षकसहितको पाँच सदस्यीय मूल्यांकन समिति गठन गरिएको छ।
छनोटमा परेका ४० जनाले जनही २५ हजार रुपैयाँका दरले पूरक अनुदान पाउनेछन् भने अन्तिम १० जनाले जनही १ लाख रुपैयाँको अतिरिक्त अनुदान प्राप्त गर्नेछन्।
गण्डकी प्रदेश सरकारले ४० लाख, सिरानचोक गाउँपालिकाले २० लाख र दायित्व नेपालले १५ लाख गरी कुल ७५ लाख रुपैयाँको कार्यक्रम सञ्चालन गरिएको हो। प्रदेश र पालिकाबाट प्राप्त ६० लाख अनुदान उद्यमीहरूलाई सिधै वितरण गरिनेछ भने दायित्व नेपालको १५ लाख प्राविधिक सहयोग, तालिम तथा व्यवस्थापन खर्चमा प्रयोग गरिनेछ।
सम्मानित उद्यमीहरू पाहुना घर सञ्चालन, कृषि, पशुपालन, मौरी पालन, सौन्दर्य सेवा, केरा, किवी, अलैँची तथा कफी खेतीमा संलग्न छन्।
गण्डकी प्रदेशभर ५ जिल्लाका ५ गाउँपालिकामा सञ्चालन गरिएको यो कार्यक्रम गोरखा जिल्लामा भने सिरानचोक गाउँपालिकामा मात्र लागू गरिएको हो, जसले स्थानीय उद्यमशीलता प्रवर्द्धनमा उल्लेखनीय योगदान गर्ने अपेक्षा गरिएको छ।
