हेटौंडा, मकवानपुर | मकवानपुरको इन्द्रसरोवर गाउँपालिका–१ स्थित मार्खु खोलामा पौडी खेल्ने क्रममा डुबेर एक युवकको मृत्यु भएको छ।
बाराको कलैया उपमहानगरपालिका–१ निवासी १८ वर्षीय प्रणय गुप्ता शनिबार दिउँसो खोलामा पौडी खेल्ने क्रममा बेपत्ता भएका थिए। घटनापछि सशस्त्र प्रहरी बल, नेपाल विपद् व्यवस्थापन वेश कुलेखानीबाट खटिएको टोलीले शनिबार साँझ गुप्ताको शव झरनाको खोँचमा फेला पारेको हो।
सशस्त्र प्रहरी निरीक्षक अमृत थापाको नेतृत्वमा परिचालित विपद् व्यवस्थापन तालिम प्राप्त टोलीले अन्य सुरक्षा निकायको सहयोगमा शव फेला पारेको सहप्रवक्ता डिएसपी शैलेन्द्र थापाले जानकारी दिए।
गुप्ता घुम्नका लागि काठमाडौंबाट आएका ८ जनाको समूहमा सहभागी थिए। उनीहरू ४ वटा मोटरसाइकलमा शनिबार बिहान सो क्षेत्रतर्फ गएका थिए। खोलामा पौडी खेल्ने क्रममा उक्त दुःखद घटना घटेको हो।
स्थानीय प्रशासनले घटनाबारे थप अनुसन्धान गरिरहेको जनाएको छ।
