पोखरा ।
पोखरेली नवरत्न, सारङ्गी सम्राट स्वर्गीय झलकमान गन्धर्वको स्मृतिमा हुलाक टिकट प्रकाशन गर्न नेपाल सरकारको ध्यानाकर्षण गरिएको छ।
पोखराको बाटुलेचौरमा वि.सं १९९२ सालमा जन्मिएर नेपाली लोक गीत र संस्कृतिको क्षेत्रमा योगदान पुुर्याएका गन्धर्वको तस्वीर अंकित हुलाक टिकट प्रकाशन गर्न सरकारका प्रवक्ता एवम् संचार तथा सुचना प्रविधि मन्त्री पृथ्वीसुब्बा गुरुङको ध्यानाकर्षण गराईएको हो। मन्त्री गुरुङ समक्ष संस्कृतिकर्मी रामबहादुर बानियाँले स्वर्गीय गन्धर्वले नेपाली लोक गीत र संगीतको क्षेत्रमा पुर्याएको योगदानको जानकारी गराउँदै, उहाँको स्मरण र योगदानको कदर स्वरूप हुलाक टिकट प्रकाशन गर्न आग्रह गरे । बानियाँले टिकट प्रकाशनका लागि गरिएको अनुरोध सहितको पत्र मन्त्री गुरुङलाई हस्तान्तरण गर्नुभयो। जवाफमा मन्त्री गुरुङले गन्धर्वको तस्वीर अंकित हुलाक टिकट प्रकाशन गर्न आफु सकारात्मक रहेको बताउँदै, केही महिना भित्रै यसको प्रक्रिया सुरु गरिने आश्वासन दिए ।
मन्त्री गुरुङलाई भेट्न संस्कृतिकर्मी बानियाँ सहित पोखरा १६ का पुर्व वडाध्यक्ष दानबहादुर बानियाँ, जीवनप्रसाद आचार्य, नेपाल गन्धर्व समुदाय विकास समाजका दिनेश गायक, सुनिल गायक लगायतका मन्त्री गुरुङ बसेको होटलमा पुगेका थिए। दर्जन भन्दा बढी लोकप्रिय गीतका सर्जक गन्धर्वले राष्ट्रिय स्तरका विभिन्न पुरस्कार तथा सम्मान पाएका छन्।
लोक संगीत र सारङ्गीको संरक्षणमा जीवन व्यतित गरेका गन्धर्वको वि.सं २०६२ मंसिर ६ गते ७१ वर्षको उमेरमा निधन भएको थियो।
