गोरखा । चाडपर्वको समयमा यात्रुहरूको चाप बढ्ने भएकाले सवारी सञ्चालनलाई व्यवस्थित गर्न गोरखामा विशेष चेकजाँच अभियान सुरु गरिएको छ । निर्धारित भन्दा बढी भाडा असुल गरी यात्रुहरूलाई सास्ती दिने गतिविधि नियन्त्रणका लागि जिल्ला प्रशासन कार्यालय गोरखाले प्रहरीको समन्वयमा छड्के चेकिङ्ग सञ्चालन गरेको हो ।
प्रमुख जिल्ला अधिकारी रामु राज कडरिया र जिल्ला प्रहरी कार्यालय गोरखाका प्रमुख प्रहरी उपरीक्षक भरत बहादुर विकको नेतृत्वमा टोलीले गोरखाको मुख्य बसपार्क, हरमटारी, घ्याम्पेसाल बसपार्क र १२ किलो बजारलगायत स्थानमा सवारी साधन तथा टिकट काउन्टरहरूको अनुगमन गरेको छ ।
जिल्ला प्रशासनका अनुसार बढी भाडा असुल गर्ने, यात्रु क्षमता भन्दा बढी सवार गर्ने वा अनियमितता देखिने सवारी साधनहरूलाई तत्काल कारबाही गरिने चेतावनी दिइएको छ । अधिकारीहरूले यात्रुहरूलाई पनि तोकिएको भन्दा बढी भाडा तिर्ने अवस्था भएमा गुनासो पेश गर्न आग्रह गरेका छन् ।
