गोरखा । गोरखा चेम्बर अफ कमर्सले सदरमुकाममा ‘तेस्रो कृषि, पर्यटन तथा व्यापार प्रबद्र्वन मेला–२०८२’ आयोजना गर्ने भएको छ । चेम्बरका अध्यक्ष रामस्वरुप श्रेष्ठका अनुसार मेला आगामी पौष २५ गतेदेखि माघ ५ गतेसम्म सदरमुकामको खेलकुद मैदानमा सञ्चालन हुनेछ ।
११ दिनसम्म चल्ने मेलाले गोरखाको ऐतिहासिक, धार्मिक, सांस्कृतिक तथा पर्यटन विकासमा टेवा पुग्ने अपेक्षा लिइएको अध्यक्ष श्रेष्ठले जानकारी दिए । मेलाको माध्यमबाट कृषि, स्थानीय उत्पादन, व्यापार व्यवसायलाई प्रबद्र्वन गर्ने र पर्यटक आकर्षित गर्ने लक्ष्य राखिएको उनले बताए ।
मेला आयोजना गर्न गोरखा नगरपालिकाले आधिकारिक स्वीकृति प्रदान गरिसकेको छ । चेम्बरका महासचिव अशोक राना मगरका अनुसार मेलासम्बन्धी राजश्व समेत नगरपालिकामा बुझाइसकिएको छ ।
यसअघि दशैँको अवसर पारेर दुई पटक मेला आयोजना गरिसकेको चेम्बरले यसपटक भने पौष महिनामा मेलाको तयारी गरेको हो ।
