गोरखा । गोरखाको पालुङटार नगरपालिकामा धानमा लाग्ने ब्लाष्ट रोग देखिएको छ । कृषि ज्ञान केन्द्र गोरखाका अनुसार पालुङटार–४, ६ र ८ मा गरी करिब ४१० रोपनी क्षेत्रमा यो रोग फैलिएको हो ।
बालि संरक्षण अधिकृत अब्बा दत्त विष्टका अनुसार सबैभन्दा धेरै पालुङटार–८ को एक हजार फाँटस्थित द्वारटारमा रोग देखिएको छ, जहाँ २५ भन्दा बढी किसानको करिब ४०० रोपनी धानबाली प्रभावित भएको छ ।
ब्लाष्ट रोग धानमा लाग्ने एक प्रकारको ढुसी हो । सुरुमै औषधि छर्कन सकिएमा नियन्त्रण सम्भव भए पनि किसानले ढिला गरी जानकारी गराउँदा केही खेतमा धान सुकेको अवस्था देखिएको विष्टले बताए ।
प्रभावित क्षेत्रमा गोरखानाथ, सावित्री र मन्सुली धान जातमा रोग देखिएको छ भने सोही ठाउँमा लगाइएको राम धान भने सुरक्षित रहेको छ । पालुङटार–४ र ६ मा भने करिब ११ रोपनी क्षेत्रफलमा मात्रै रोग देखिएको कृषि ज्ञान केन्द्रले जनाएको छ ।
‘किसानले ढिला गरी खबर गरेकाले केही खेतमा धान सुकेको देखियो,’ विष्टले भने, ‘तर ढुसीनाशक औषधि छर्किएकाले उपचार सफल भए ५० प्रतिशतसम्म धानबाली जोगाउन सकिन्छ ।’
ब्लाष्ट रोग फैलिनुको मुख्य कारण किसानले स्रोत पहिचान नगरी धानको बिउ खरिद गर्नु भएको बताउँदै विष्टले उन्नत जात वा पहेँलो ट्याग भएको बिउ प्रयोग गर्न किसानलाई आग्रह गरेका छन् ।
