गोरखा । गोरखा सदरमुकाममा भोली (बिहीबार)देखि तेस्रो कृषि, पर्यटन तथा व्यापार प्रबर्द्धन मेला २०८२ सुरु हुँदैछ। मेला गोरखा चेम्बर अफ कमर्स र नेपा–ओमन चेम्बर अफ कमर्स गोरखाको संयुक्त आयोजनामा सञ्चालन हुने भएको हो।
गोरखा चेम्बर अफ कमर्सका अध्यक्ष राम स्वरुप श्रेष्ठका अनुसार मेलाको सम्पूर्ण तयारी पूरा भएको छ। मेला गोरखा नगरपालिका–६ स्थित खेलकुद मैदानमा सुरु भई मंसिर ३० गतेसम्म सञ्चालन हुनेछ।
मेलाको उद्घाटन गोरखा नगरपालिकाका मेयर कृष्ण बहादुर राना मगरले गर्नेछन्। उद्घाटनको दिन बिहान ११ बजे विभिन्न जातजातिका सांस्कृतिक झाँकी, महिला समूह र संघ–संस्थाहरुको सहभागितामा गोरखा बजार परिक्रमा गरिनेछ।
मेला अवधिभर ३० देखि ३२ हजार मानिसले अवलोकन गर्ने र करिब ४ करोड रुपैयाँ बराबरको कारोबार हुने अनुमान गरिएको छ।
१५० वटा स्टल रहने मेलामा कृषि प्रदर्शनीका लागि १०, होटल तथा रेस्टुरेन्टका लागि ६ र बाँकी अन्य व्यवसायिक प्रयोजनका स्टल रहनेछन्। साथै, बाल उद्यान, खेल–मनोरञ्जन, पिङ, कृषि उपज, घरेलु उत्पादन, हस्तकला, प्रविधि, पर्यटन तथा सेवा क्षेत्रका वस्तुहरू प्रदर्शनीमा राखिने गोरखा चेम्बर अफ कमर्सले जनाएको छ।
