गोरखा । ऐतिहासिक तथा आध्यात्मिक महत्व बोकेको गोरखा पुनः राष्ट्रिय चेतना जागरणको केन्द्र बन्ने दिशामा अघि बढ्दैछ। गोरखनाथ कल्याण केन्द्र नेपालले आगामी आर्थिक वर्षको सुरुवातसँगै “धर्म नीति आधारित महाअभियान” सुरु गर्ने घोषणा गरेको छ।
केन्द्रका अनुसार यो अभियान धार्मिक अभ्यासमा मात्र सीमित नरही राष्ट्र निर्माणका लागि आवश्यक नैतिकता, अनुशासन र चेतनालाई पुनर्स्थापित गर्ने उद्देश्यसहित अघि बढाइनेछ। अभियानको मूल लक्ष्य धर्मलाई कर्मकाण्डमा सीमित नराखी जीवन, समाज र राज्य सञ्चालनको आधारका रूपमा स्थापित गर्नु रहेको बताइएको छ।
यसअघि नै केन्द्रले देशका विभिन्न स्थानमा शक्तिपीठ स्थापना गर्दै आध्यात्मिक ऊर्जा सन्तुलनको आधार तयार गरिसकेको छ। संरक्षक अनन्त प्रसादका अनुसार कुशेश्वर, पालुङ, विजयपुर, भकुण्डेबेशी र राम्चेवेशीमा शक्तिपीठ स्थापना भइसकेका छन् भने गोरखामा “राजविद्या शक्तिपीठ” निर्माण भइरहेको छ।
गोरखा नगरपालिका–९, सिखरडाँडामा निर्माणाधीन उक्त शक्तिपीठको करिब ८० प्रतिशत काम सम्पन्न भइसकेको छ र केही महिनाभित्र पूर्णता दिने लक्ष्य राखिएको छ। यसलाई केवल धार्मिक संरचना नभई दैविक ऊर्जा, नैतिकता र राष्ट्रशक्ति बीच सन्तुलन कायम गर्ने केन्द्रका रूपमा विकास गरिने योजना छ।
शक्तिपीठका पीठाधीश अच्युतकृष्ण शरणले धर्म–नीतिलाई प्रभावकारी बनाउन दैविक ऊर्जाको भूमिका महत्वपूर्ण हुने उल्लेख गर्दै आध्यात्मिक ऊर्जा र राज्यशक्ति बीच समन्वय नभएसम्म दीर्घकालीन शान्ति र समृद्धि सम्भव नहुने धारणा राखे।
पीठ निर्माण सम्पन्न भएपछि सतगुरु गोरक्षनाथ, माँ गोरखकालीलगायत विभिन्न देवी–देवताका मूर्ति स्थापना गरिनेछ, जसले यस स्थानलाई साधना र श्रद्धाको केन्द्र बनाउने अपेक्षा गरिएको छ।
अभियानअन्तर्गत शक्तिपीठ निर्माणपछि “नमुना गुरुकुल” स्थापना गर्ने योजना पनि रहेको छ। गुरुकुलमा वेद, उपनिषद्, योग, ध्यानसँगै नेतृत्व विकास, नैतिक शिक्षा, अनुशासन र सामाजिक उत्तरदायित्वसम्बन्धी समग्र शिक्षा प्रदान गरिनेछ। यसको उद्देश्य चरित्रवान्, जिम्मेवार र राष्ट्रप्रेमी नागरिक उत्पादन गर्नु रहेको केन्द्रले जनाएको छ।
त्यस्तै, केन्द्रले गोरखालाई विश्वस्तरको आध्यात्मिक योग केन्द्रका रूपमा विकास गर्ने दीर्घकालीन योजना अघि सारेको छ। योग, ध्यान, दर्शन तथा वैदिक अध्ययनका लागि अन्तर्राष्ट्रिय स्तरको अध्ययन तथा अनुसन्धान केन्द्र विकास गर्ने लक्ष्य राखिएको छ। यसबाट धार्मिक पर्यटन प्रवर्द्धन, रोजगारी सिर्जना तथा वैदिक परम्पराको संरक्षणमा टेवा पुग्ने अपेक्षा गरिएको छ।
केन्द्रले यो अभियानलाई सम्पूर्ण राष्ट्रप्रेमी नागरिकको साझा अभियानका रूपमा अघि बढाउने बताउँदै सहभागी हुन इच्छुक व्यक्ति तथा संस्थालाई सम्पर्क गर्न आह्वान गरेको छ।
