गोरखा। गण्डकी प्रदेशका सांसद तथा नेपाल समाजवादी पार्टी (नयाँ शक्ति) का नेता फणिन्द्र देवकोटाले गोरखा नगरपालिका–९ लक्ष्मीबजारमा पहिरोले घर बगाएका मानसिंह गुरुङलाई भेटेका छन्।
सांसद देवकोटासँगै गण्डकी प्रदेशका मुख्यमन्त्री सुरेन्द्रराज पाण्डेका प्रेस संयोजक नरहरि सापकोटाले बिहीबार गुरुङलाई भेटी घटनाबारे जानकारी लिएका हुन्।
भेटका क्रममा सांसद देवकोटाले पहिरो घटनाका विषयमा मुख्यमन्त्री सुरेन्द्रराज पाण्डेसँग आफूले छलफल गरिसकेको र प्रदेश सरकारबाट सम्भव भएसम्म सहयोग हुने आश्वासन प्राप्त भएको बताए।
यसैबीच, उनीहरूले गोरखा नगरपालिका–११ तेह्रकिलो नजिक रहेको गोरखकाली फ्युल सेन्टरमा पहिरोले पुर्याएको क्षतिको पनि निरीक्षण गरेका छन्। लगातारको वर्षापछि आएको पहिरोले फ्युल सेन्टरमा क्षति पुर्याएको थियो। 
