१३ चैत, गोरखा । ‘सांस्कृतिक कला स्थानीय खाना, पर्यटन प्रर्वद्धन हाम्रो चाहाना’ भन्ने मूलनाराका साथ गोरखामा पहिलोपटक ऐतिहासिक ‘सडक खाना महोत्सव– २०८०’ को आयोजना हुने भएको छ ।
गोरखा सदरमुकामस्थित मंगलबार होटल व्यवसायी सङ्घ गोरखाले होटल गोरखा प्यालेसमा पत्रकार सम्मेलन गर्दै गोरखाको ऐतिहासिक स्थानहरुको पहिचान गराइ पर्यटन प्रर्वद्धन गर्ने उद्देश्यका साथै गोरखाका स्थानीयहरु नयाँ बर्ष मनाउन बाहिरी जिल्ला जानपर्ने बाध्यतालाई मध्यनजर गर्दै उक्त ‘सडक खाना महोत्सव– २०८०’ हुन लागेको आयोजकले जनाएको छ।
होटल व्यवसायी सङ्घ गोरखाद्वारा आयोजित उक्त महोत्सव यही चैत ३० गते सञ्चालन हुने होटल व्यवसायी सङ्घ गोरखाका अध्यक्ष निधि तिमिल्सिनाले बताए ।
गोरखा बसपार्क देखि ठुलो आगन सम्मको खुल्ला सडकमा हुने उक्त महोत्सवमा रानीपोखरी परिसरमा मंच बनाइ गोरखाका विभिन्न जातजातिका संस्कृती झल्काउने झाँकी नाच, लोकदोहरी, स्थानीय कलाकारहरुबाट गीत प्रदर्शन आदि हुने अध्यक्ष तिमिल्सिनाले बताए । त्यस्तै रैथाने खानाका परिकार, नेवारी, चाइनिज, इन्डियन, इटालियन तथा बेकरीसहित ५० भन्दा बढी खाना कक्ष रहने जनाएको छ ।
गोरखाको पर्यटन प्रबर्द्धन, स्थानीय परिकार र स्थानीय संस्कृतिको प्रचार प्रसार गर्ने मुल उद्देश्यका साथ उक्त सडक खाना महोत्सव गर्न लागिएको अध्यक्ष तिमिल्सिनाले बताए ।
