सल्यानमा चुनावी प्रचारका लागि प्रयोग भएको जिपबाट चामल र मदिरा बरामद गरिएको छ। जिल्ला प्रहरी कार्यालय सल्यानका अनुसार बनगाड–कुपिण्डे नगरपालिका–१ सल्लीबजारमा राष्ट्रिय स्वतन्त्र पार्टी (रास्वपा) को झण्डा लगाइएको कर्णाली प्रदेश ०२–००१ च ०४२९ नम्बरको जिपबाट दुई बोरा चामल, २१० बोत्तल मदिरा, दुई कार्टुन बियर र तीन कार्टुन खाने तेल फेला परेको हो।
घटनामा संलग्न भएको आशंकामा चालक सिद्धकुमाख गाउँपालिका–४ का २४ वर्षीय चन्द्रप्रकाश बुढाथोकी र बनगाड–कुपिण्डे–१ का ३७ वर्षीय मोहन बिसीलाई प्रहरीले नियन्त्रणमा लिएको छ। चालक बुढाथोकीले सामान बिसीकै रहेको र उनको आग्रहमा खैरागारतर्फ लैजान राखिएको बयान दिएका छन्।
निर्वाचनलाई लक्षित गरी सामान वितरण हुन सक्ने आशंकामा नियन्त्रणमा लिइएको प्रहरीले जनाएको छ। घटनाबारे रास्वपा सल्यानले हालसम्म आधिकारिक प्रतिक्रिया दिएको छैन।
